Jemi në anarki, varfëri dhe kaos. Rrëzim i status-quosë

Nga Bujar Nishani

Prej disa vitesh jeta jonë ka marrë jo thjesht një kahje të gabuar por një të tatëpjetë. E në këtë të tatëpjetë jemi duke u përplasur të gjithë, burra e gra, të rinj e të moshuar, të kamur e të varfër, të përgjegjshëm e të pa përgjegjshëm, votues dhe abstenues, të djathtë e të majtë, dashurues dhe kundërshtues të pushtetit. Sot është prioritet emergjent shembja e status quo-së, social politike që ka ngërthyer të gjithë vendin. Që nga shtatori i vitit 2013 në Shqipëri u dizenjua dhe implementua një platformë sa fatkeqe aq dhe e papërgjegjshme. Çuarja e Shqipërisë drejt një KAOSI total social ku qytetari humbet cdo orientim dhe dimension normal. Ai kthehet në një qënie e varfër, e pasigurtë, e frikësuar, amorfe dhe pa nerv. Ky KAOS menaxhohet nga grupet kriminale dhe “të fortët”. Mjerimi i madh nis nga rrethina e Tiranës e cek çdo skaj të vendit, veri e jug, lindje e perëndim, tej e ndanë një hapësire e matshme kjo gjeografikisht jo më shumë se sa e një kryeqyteti evropian. Kjo meriton reagim dhe protestë ! Institucionet e shtetit janë sulmuar, degraduar dhe nuk ofrojnë as garanci dhe as shërbim. Për këtë duhet protestuar ! Shteti ynë po humbet çdo ditë nga pak arsyen pse duhet një shtet. Këtë duhet ta ndalojmë ! Shqiptarët nisën të lëvizin si njerëz të lirë dhe në normalitet që nga viti 2010. Sot trajtimi i tyre në sportelet e kontrollit të vendeve të Shengenit është kthyer siç ai i viteve ‘90. E ky nuk është faji i të tjerëve. Nëse ne u dërgojmë drogë, krim dhe pasiguri kufitare, fajtorin e kemi mes nesh. Ne duhet ta ndëshkojmë atë dhe rikthejmë normalitetin për të gjithë ne ! Për herë të parë në këto 25 vitet e fundit mediat prestigjoze botërore si BBC, Neësëeek, Financial Times, Le Figaro, Süddeutsche Zeitung, La Repubblica etj., po na tregojnë si faqe të zezë e narkotrafikut për shkak të disa faqezinjëve në mes nesh që duhen ndalur. Edhe protesta është një mënyrë për ta nisur ndaljen e tyre ! Zëri, modeli dhe fytyra e qytetarisë është zëvendësuar me injorancën dhe harbutërinë që tenton të na përfaqësoj të gjithëve. Për këtë duhet protestuar ! Korrupsioni ka kalçifikuar statusin e të privilegjuarit dhe pandëshkueshmërisë. Protesta të paktën e denoncon atë ! Urrejtja klasore ka rilindur në formën e vet më revanshiste. Ish të përndjekurve politik ju mohohet e drejta e parashikuar me ligj në procesin e rehabilitimit të tyre. Pronarëve të shpronësuar nga rregjimi stalinist ju është bllokuar e drejta e rikthimit të pronës familjare. Protesta denoncon këto akte burracakërie ! Kërkesa e shqiptarëve për reformën në drejtësi u shëndërrua në një platformë për kontrollin politik të pushtetit të drejtësisë. Gërma dhe fryma e Kushtetutës miratuar me konsensus u minua harbutërisht në mënyrë të parikuperueshme në këtë status quo. Grupi që dominon të gjithë pushtetin operacional ushtron vullnetin e vet njëanëshmërisht në kontrollin me anë të policisë dhe joshjes të gjithë piramidës së sistemit të drejtësisë. Për një reformë të vërtetë në drejtësi duhet protestuar ! Përpjekja për arsimim dhe punësim u zëvendësua nga rradhët e gjata për formularët e emigrimit. 300 mijë shqiptarë aplikuan veç të ikin në 2016. Dyfishimi tyre është shënuar në 2017. Një tmerr kombëtar pa fund ky. Protesta më së paku e denoncon këtë poshtërim ku zullumqari e zhyti qytetarin ! Në këtë ambjent arrogance e tehposhtje reagimi parlamentar dhe ekstra parlamentar ka rëndësi fondamentale. Ato parlamentare janë të shumëllojshme dhe do jepnin rezultate të rëndësishme. Ato ekstraparlamentare janë domozdoshmëri e këtij realiteti që degradon pa ndalim cdo ditë. Në Shqipëri është atrofizuar demokracia dhe vendi po shkon fatalisht drejt përplasjes së fortë. Pluralizmi politik po nis të konsiderohet i panevojshëm. Media kur nuk blihet gjobitet. “Shoqëri Civile”, mbahet si distinktiv ndër rreshtarët militarë. Ndaj qytetaria duhet të kundërshtoj ! Opozita ka të drejtën por dhe detyrën të kërkoj fjalën, zemrën dhe nervin e shqiptarëve në Protestë ! Shqiptarët më tej, meritojnë të shohin rrugëtimin e qartë të ndryshimit. Sot, protesta nuk është “Për” partinë por “Kundër” status quo-së. Sot, na vyen jo ruajtja e status quo-së por rrëzimi i saj pasi nuk jemi në begati dhe normalitet por anarshi, varfëri dhe kaos.